އަސާސީ ބައެއް ތަކެތީގެ އަގު ކޮންޓްރޯލް ކޮށްފި

އާންމު ދިރިއުޅުމުގައި ބޭނުންކުރާ ބައެއް ތަކެތީގެ އަގު ސަރުކާރުން ކޮންޓްރޯލް ކޮށްފިއެވެ.

ކޮވިޑް19 އާ ގުޅިގެން ރާއްޖޭގެ އިޤްތިޞާދަށް ހީނަރުކަން އައިސްފައިވާ އިރު، އާންމު ރައްޔިތުންގެ ދިރިއުޅުމުގެ ޙާލަތަށް ވެސް ބޮޑެތި ބަދަލުތަކެއް ވަނީ އައިސްފައެވެ. މި ދަނޑިވަޅުގައި އިކޮނޮމިކް މިނިސްޓްރީގެ ފަރާތުން މިވަނީ ތަކެތީގެ އަގު ކޮންޓްރޯލް ކުރުމަށް ނިންމާފައެވެ. އިކޮނޮމިކް މިނިސްޓްރީން ނެރުނު އިޢުލާނެއްގައިވާ ގޮތުން، ރީޓެއިލްކޮށް އެންމެ އަގުބޮޑުކޮށް ވިއްކޭނެ އަގު ވަނީ ކަނޑައަޅާފައެވެ.

ތަކެތީގެ އަގު ކޮންޓްރޯލްކުރި ގޮތަށް ބަލާއިރު، ރަތްފިޔާ ކިލޯއެއް -/20 ރުފިޔާ، އާދައިގެ އަލުވި ކިލޯއެއް -/20، ރީނދޫ މުގު ކިލޯއެއް -/45 ރުފިޔާ އަދި ހުދު ކުކުޅު ބިހެއް 1.80 ރުފިޔާ އަށް ވަނީ ކޮންޓްރޯލް ކޮށްފައެވެ.

އަގުތައް ކޮންޓްރޯލް ކުރުމަށް ނިންމާފައި މިވަނީ 06 އެޕްރީލް އިން ފެށިގެންނެވެ. މިނިސްޓްރީން ކަނޑައަޅާފައިވާ އަގަށްވުރެ ބޮޑުކޮށް ވިއްކައިފިނަމަ، ފުރަތަމަ ފަހަރު 100،000.00 ރުފިޔާއަށް ވުރެ އިތުރުނުވާ ގޮތަށް އަދި ތަކުރާރުވެއްޖެނަމަ ކޮންމެ ފަހަރަކު 100،000.00 ރުފިޔާގެ އިތުރުން ވިޔަފާރި ކުރުމުގެ ހުއްދަ 6 މަސްދުވަހަށް ހިފެހެއްޓުމަށްވެސް ވަނީ ނިންމާފައެވެ.