މިދަނޑިވަޅުގައި އިންޓަނެޓްގެ އަގު ހެޔޮކޮށްފައި ނުވާކަމަށް ބުނެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމު ހުށަހެޅި މައްސަލަ ކޮމިޓީއަށް ފޮނުވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، ކޮވިޑް 19 ގެ މި ދަނޑިވަޅުގައި ލުޔެއް ދިނުމަށް، އިންޓަނެޓުގެ އަގުހެޔޮ ނުކުރާ މައްސަލަ، މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީއަށް ފުނުވާފައިވާކަމަށެވެ.
މަޖިލީހުގެ ރައީސަށް ފޮނުއްވި ސިޓީގައި މީކާއިލް ވަނީ ކޮވިޑް 19 އާ ގުޅިގެން ސިއަހީ ކުއްލި ނުރައްކަލުގެ ހާލަތު އިއުލާނުކޮށްފައިވާއިރު ވަޒީފާ އަދާކުރާ މީހުން އޮންލައިންކޮށް ވަޒީފާ އަދާކުރަމުގެ އިތުރަށް، ދަރިވަރުން ގޭގައި ތިބެގެންކިޔެވަމުން ދާއިރު، އެފަރާތްތަކަށް އިންޓަނެޓުގެ ހިދުމަތަކީ ޒަރޫރީ ހިދުމަތެއް ކަމުގައެވެ.
އަދި މީކާއިލް ވިދާޅުވީ މިދަނޑިވަޅުގައި މުވާސަލާތީ ހިދުމަތްދޭ ކުންފުނިތަކުން އާމުންނަށް އެކަށީގެންވާ ލުޔެއް ދީފައިނުވާ ކަމަށެވެ. އަދި އެ ކުންފުނިތައްދޭ ހިދުމަތުގެ އަގު ކޮންޓްރޯލްކުރުމުގެ ބާރު ކޮމިއުނިކޭޝަން އޮތޯރިޓީއަށް ލިބިފައިވީއިރު ކުންފުނިތަކުން އަމިއްލަ އިސްނެގާފައި ނުވާކަމަށެވެ. މި ހާލަތުގައި ރައްޔިތުންނަށް ލުޔެއް ހޯދައިދިނުމަށް އެ ފަރާތުން އެއްވެސް ފިޔަވަޅެއް އަޅާފައި ނުވާކަމަށް ވެސް ސިޓީގައި ވިދާޅުވެފައިވެއެވެ. މިކަން މިހެން އޮތުމުން މީކާއިލްވަނީ ކޮމިއުނިކޭޝަންސް އޮތޯރިޓީގެ އިސްވެރިން ކޮމިޓީއަށް ހާޒިރުކޮށް ސުވާލު ކުރުމަށް ސިޓީގައި އެދިވަޑައިގެންފައި ވެއެވެ.
މީކާއިލް މިހެން ވިދާޅުވީއިރު ދިރާގު އަދި އުރީދުއިން ވަނީކަސްޓަމަރުންނަށް ބޯނަސް ޑޭޓާ ލުއި ފަސޭހަ ގޮތްތަކަށް ހޯދޭނެ ގޮތް ހަދާދީފައިވާނެ ކަމަށްބުނެފައެވެ