ކޮވިޑް-19 ޖެހިގެން އެންމެ ގިނަބަޔަކު މަރުވި އެއް ގައުމު ތެރޭގައި ހިމެނޭ އިޓަލީން، މި ވައިރަސްއަށް ފަރުވާ ކުރުމުގައި ހަރަކާތްތެރިވި 100އަށް ވުރެ ގިނަ ޑޮކްޓަރުން މަރުވެފައިވާކަން ހާމަވެއްޖެވެ.
އެ ގައުމުގެ ޑޮކްޓަރުންގެ ފެޑެރޭޝަނުން އާއްމުކޮށްފައިވާގޮތުން މިއަދާއި ހަމައަށް އެ ގައުމުން މަރުވި ޑޮކްޓަރުންގެ އަދަދު ވަނީ 100 އަށްވުރެ މައްޗަށް އަރާފައެވެ. އެ ގައުމުން މަރުވެފައި ވަނީ ފިޒީޝަނުންނެވެ. މިވައިރަސް ޖެހިގެން އިތުރު 30 ނަރުހަކާއި، ނަރުހުންގެ އެސްސްޓެންސްގެ ގޮތުގައި މަސައްކަތް ކުރަމުންދިޔަ ބަޔަކުވެސް ވަނީ މަރުވެފައިވާކަމަށް އިޓަލީގެ މީޑިއާ ރިޕޯޓްތައް ދައްކައެވެ.
ފަހުގެ ރިޕޯޓްތައް ބުނާގޮތުން އިޓަލީގައި މަސައްކަތް ކުރަމުންދާ 13121 ސިއްހީ ހިދުމަތްތެރިއަކު ވަނީ ކޮވިޑް-19 އަށް ޕޮޒިޓިވް ވެފައެވެ. އިޓަލީގައި މި ވައިރަހަށް ޕޮޒިޓިވް ވިމީހުންގެ އަދަދު ވަނީ 139.422 އަރާފައެވެ.
އިޓަލީގައި މި ބަލި ޖެހުނު 10 އިންސައްތަ މީހުންނަކީ ސިއްހީ ދާއިރާގައި މަސައްކަތް ކުރާ މީހުންކަން އިޓަލީގެ ތަފާތު ހިސާބުތަކުން ދައްކައެވެ.
