ކޮވިޑް-19 އާއި ގުޅިގެން ރާއްޖެއިން އެހީއެއް ބޭނުން ވެއްޖެ ނަމަ ޗައިނާއިން ރާއްޖެއަށް އެހީވާނެ ކަމުގެ ޔަގީންކަން އެ ގައުމުގެ ފޮރިން މިނިސްޓަރު އަދި ސްޓޭޓް ކައުންސިލާ ވަންގް ޔީ ދެއްވައިފި އެވެ.
ރާއްޖޭގެ ފޮރިން މިނިސްޓަރު އަބްދުﷲ ޝާހިދު ވަންގް ޔީ އަށް ފޯނުން ގުޅުއްވާ ވާހަކަ ދައްކަވަމުން ކޮވިޑް-19 އާއި ދެކޮޅަށް ކުރެވޭ މަސައްކަތުގައި ރާއްޖެއިން އެހީއަކަށް އެދިއްޖެ ކޮންމެ އިރެއްގައި ޗައިނާއިން ރާއްޖެއަށް އެހީވެދޭނެ ކަމުގައި ބުނެފައިވެއެވެ. އަދި މިދެ ބޭފުޅުން ވަނީ ކޮވިޑް-19 ފެތުރުން ކޮންޓްރޯލު ކުރުމަށް ދެ ގައުމުން ކޮށްފައިވާ މަސައްކަތުގެ ތަޖުރިބާ ހިއްސާ ކުރައްވާފައެވެ. ވަންގް ޔީ ވަނީ ރާއްޖެ އިން އަޅާފައިވާ އަދި އަޅަމުންދާ ފިޔަވަޅުތަކަށް ތައުރީފު ކުރައްވާ ވާހަކަފުޅު ދައްކަވާފައެވެ.
މިދިޔަ ޑިސެމްބަރު މަހު ޗައިނާ އިން އުފަންވި ކޮވިޑް-19 މުޅި ދުނިޔެ އަށް ފެތުރިފައިވާއިރު މިބަލި ޗައިނާގައި އެންމެ ފުރަތަމަ ފެތުރެންފެށި ހޫބޭ ޕްރޮވިންސްގެ ވޫހާން ސިޓީއިން މިބަލި ކޮންޓުރޯލް ކުރެވި އެސިޓީ ވަނީ އާންމު ހާލަތަކަށް ގެނެސްފައެވެ.
އަދި ރާއްޖޭގެ ފޮރިން މިނިސްޓަރު ޝާހިދު ވަނީ ކޮވިޑް-19 އިން ރައްކާތެރިވުމަށް ބޭނުންވާ ވަސީލަތްތަކެއް ހަދިޔާ ކޮށްފައިވާތީ ޗައިނާއަށް ޝުކުރު އަދާ ކޮށްފައެވެ.