ކޮވިޑް19 ޖެހިގެން އިޓަލީން 100 ޑޮކްޓަރުންނާއި 30 އަށްވުރެ ގިނަ ނަރުހުން މަރުވެއްޖެއެވެ.
އިޓަލީގެ ހެލްތު އެސޯސިއޭޝަނުން ބުނެފައިވަނީ، މަރުވި ޑޮކްޓަރުންގެ ތެރޭގައި، ރިޓަޔަރ ކޮށްފައިވާ ޑޮކްޓަރުންގެ ތެރެއިން އަލުން ޚިދުމަތަށް ނުކުތް ޑޮކްޓަރުންވެސް ހިމެނޭ ކަމަށެވެ. މީޑިއާ ރިޕޯޓުތައް ބުނާ ގޮތުން ނަރުހުންގެ އިތުރުން ނަރުހުންގެ އެހީތެރިންވެސް ވަނީ ކޮވިޑް-19 ޖެހިގެން މަރުވެފައެވެ.
އިޓަލީން މިހާ ގިނަ އަދަދަކަށް ސިއްހީ ފަރުވާ ދިނުމުގައި ޙަރަކާތްތެރިވާ މީހުން މަރުވަމުންދަނީ، ކޮވިޑް-19 ޖެހޭ މީހުންނަށް ފަރުވާ ދިނުމުގައި ޙަރަކާތްތެރިވާ ޑޮކްޓަރުންނާއި ނަރުހުން އަދި އެހެނިހެން ސިއްހީ އެހީތެރިންނަށް ވައިރަހުން ރައްކާތެރިވެވޭނެ ސަލާމަތީ ފިޔަވަޅުތައް ނެތުމުގެ އިތުރުން، ބަލިޖެހިފައިވާ މީހުންނާއެކު ފަރުވާދޭ ހޮސްޕިޓާތަކާއި މަރުކަޒުތައް ފުރިފައިވާތީއެވެ.
އިޓަލީގައި މިހާތަނަށް 147،577 މީހުންނަށް ކޮވިޑް ޖެހިފައިވާއިރު، 18،849 މީހަކު ވަނީ މަރުވެފައެވެ. އަދި، 30،445 މީހަކު މި ބަލިން ވަނީ ރަނގަޅުވެފައެވެ.