ކޮޮވިޑް-19 އާއި ގުޅިގެން ރާއްޖޭގެ ކަމާބެހޭ ފަރާތްތަކުން ދެމުން ގެންދިޔަ އިރުޝާދުތަކަށް ދިވެހިން ބޯ ނުލަނބާކަން މާލެއިން އެންމެ ފުރަތަމަ ޕޮޒިޓިވްވި އަންހެން މީހާގެ ޓްރޭސިން ހަދަން ފެށުމުން ފާހަގަ ވެއްޖެ ކަމަށް ޑރ. އަފްޒަލް ވިދާޅުވެއްޖެއެވެ.
ޑރ. އަފްޒަލް ވިދާޅުވީ، ކޮވިޑް-19ގެ ފުރަތަމަ ޕޮޒިޓިވް ކޭސް ފެނުނީއްސުރެ އާންމުންނަށް ދެމުން ގެންދިޔަ އިރުޝާދުތަކާއި އިޖުތިމާއީ ގައިދުރުކަމާއި ގޭގައި މަޑުކުރުމަށް ދެމުން ގެންދިޔަ އިރުޝާދުތަކަށް ދިވެހިން ދިނީ ބީރު ކަންފަތެއްކަން އިނގިފައިވާ ކަމަށެވެ.
ޑޮކްޓަރުން ރައްކާތެރިކަމުގެ ގޮތުން އާންމުން އަޅަންޖެހޭ ފިޔަވަޅުތަކާ ގުޅޭ މައުލޫމާތު ކެނޑިނޭޅި ދެމުން ދިޔަނަމަވެސް އެމަސައްކަތްވީ ފޫނެތް ފަޔަކަށް ފެންފުރުން ކަހަލަކަމަކަށެވެ. މާލެ އިން ކޮވިޑް-19 އަށް ޕޮޒިޓިވް ވި ކޭސް 21 ގެ ކޮންޓެކްޓް ޓްރޭސިން ހަދަން ފެށުމުން ފެނިގެން ދިޔައީ ހައިރާންވާ ކަހަލަ މަންޒަރެކެވެ. އެ މީހާއާއި ކޮންޓެކްޓްވި މީހުން ގިނަވެ މާލެއާއި ހުޅުމާލެއާއި، އަތޮޅުތެރޭގެވެސް އެތައް ރަށްރަށެއްގެ އެތަކެއް ގެއެއް މޮނިޓަރިންގެ ހާލަތަކަށް ވަނީ ގެންނަން ޖެހިފައެވެ.
އާންމުންގެ ސަލާމަތާ ރައްކާތެރިކަމަށް އެދި ކަމާބެހޭ ފަރަތްތަކުން އަބަދާއަބަދު ގޮވާލަމުން ދާއިރު، ގޭގައި މަޑުން ނުތިބެ އެތަން މިތަނަށް ދިއުމާ، ޕާޓީ ބޭއްވުން ފަދަ އެތަކެއް އިޖްތިމާއި އެއްވުންތަކެއް ކޭސް 21 ގެ ކޮންޓެކްޓް ޓްރޭސިންގެ ތެރެއިން ފާހަގަ ވެފައި ވާކަމަށް ކަމާބެހޭ ފަރާތްތަކުން ވަނީ ބުނެފައެވެ.