ކޮވިޑް19 އަށް ރައްކާތެރިވުމުގެ ފިޔަވަޅެއްގެ ގޮތުން ސައުދީ އަރަބިއްޔާގެ ވެރިރަށް ރިޔާޒް ހިމެނޭގޮތަށް 3 ސިޓީ ލޮކްޑައުން ކުރުމަށް ނިންމައި، ސައުދީގައި ކާފިއު އިޢުލާންކޮށްފިއެވެ.
ސައުދީގެ ވެރިރަށް ރިޔާޒް، މައްކާ އަދި މަދީނާ ލޮކްޑައުން ކުރުމަށް ނިންމާފައި މިވަނީ މިއަދުން ފެށިގެން 21 ދުވަހުގެ މުއްދަތަށެވެ. މި މުއްދަތުގެ ތެރޭގައި މި 3 ސިޓީއަށް ވަދެ ނިކުމެ ހެދުން މަނާކޮށްފައިވާއިރު، ބައެއް ގަޑިތަކުގައި ގެއިން ބޭރަށް ނުކުމެ އުޅުންވެސް ވަނީ މަނާކޮށްފައެވެ. އަދި، މި ނިންމުމާ ޚިލާފުވާ ފަރާތްތަކާމެދު ހަރުކަށި ފިޔަވަޅުތަކެއް އެޅުމަށްވެސް ސައުދީން ވަނީ ނިންމާފައެވެ. މި 3 ސިޓީގެ އިތުރުން ސައުދީގެ އިތުރު 13 ޕްރޮވިންސެއަކަށް ދަތުރުފަތުރުކުން ވެސް ވަނީ މަނާކޮށްފައެވެ.
ސައުދީގައި ކާފިއު އިޢުލާން ކޮށްފައިވީނަމަވެސް، ސެކިއުރިޓީ ބަހަލައްޓާ ފަރާތްތަކާއި، ސަލާމަތީ ބާރުތަކާއި، މީޑިއާ އަދި ސިއްހީ ދާއިރާގެ ފަރާތްތައް މި ނިންމުންތަކުން އިސްތިސްނާ ވާނެކަމަށް ވެސް ވަނީ ނިންމާފައެވެ.
ސައުދީގައި މިހާތަނަށް ކޮވިޑް ޖެހިގެން 2 މީހަކު މަރުވެފައިވާއިރު، ވައިރަސްއަށް ފައްސިވެފައިވާ މީހުންގެ އަދަދު 900 އަށް ވުރެ މައްޗަށް ވަނީ އަރާފައެވެ.
