އދ.މާމިގިލީގައި މަސައްކަތްކުރާ ވިލާ ކުންފުނީގެ މުވައްޒަފުންނަށް އަދިވެސް މުސާރަ ނުލިބޭކަމަށް ބުނެ ކުންފުނީގެ މުވައްޒަފުން ކަނބޮޑުވުން ފާޅުކުރަން ފަށައިފިއެވެ.
ކުއްލި ޚަބަރަށް މަޢުލޫމާތު ލިބިފައިވާ ގޮތުގައި، މާމިގިލީގައި ވަޒީފާއަދާކުރާ 85% މުވައްޒަފުންނަކީ ވިލާ ކުންފުނީގައި މަސައްކަތްކުރާ މީހުން ކަމާއި، މާރިޗު މަހުގެ މުސާރަ ލިބިފައިވާ ވަރަށް މަދު މުވައްޒަފުންނަށެވެ. މުސާރަ ނުލިބުމުން އެތައް ޢާއިލީއަކަށް ދިރިއުޅުމުގެ ކަންކަން ހަމަޖެއްސުމަށް ބޮޑެތި ދަތިތަކާ ވަނީ ކުރިމަތިލާންޖެހިފައެވެ. މިފަދަ ބޮޑު ބަލިމަޑުކަމެއް އޮތް ދުވަސްވަރެއްގައި، މުވައްޒަފުންނަށް މުސާރަ ނުލިބުމުގެ ސަބަބުން ކެއިންބުއިމަށާއި ޒަރޫރީ ބޭނުންތަކަށް ކޮންމެހެން ގަންނަންޖެހޭ ތަކެތި ހޯދޭނެގޮތެއް ނެތްކަމަށްވެސް އެ ރަށުގެ ބައެއް މުވައްޒަފުން ދަނީ ބުނަމުންނެވެ. އެގޮތުން، ވިލާގެ މުވައްޒަފުންނަށް މުސާރަ ނުލިބުމުން އެފަދަ ތަކެތި އެމުވައްޒަފުންގެ ޢާއިލާތަކަށް ހޯދޭނެގޮތް ނެތި ގޮސްހުސްވެފައިވާކަމަށް މަޢުލޫމާތު ލިބެއެވެ.
މީގެއިތުރުން، މާމިގީލިގެ ފިހާރާތަކުން މިހާރު ޒަރޫރީ ބޭނުންތަކަށް ބޭނުންކުރާ ގިނަ ތަކެތި ހުސްވެފައިވާކަމަށާއި، ބައެއް ފަރާތްތަކުން ހަނޑު ހަކުރު ފަދަ ތަކެތި އަދަދަކަށް ގަނެ ގޭގައި ސްޓޮކް ކުރުމުން، ރަށުގެ އާންމުންނަށް އެފަދަ ތަކެތި ލިބޭނެގޮތް މިވަނީ ހުސްވެފައެވެ. އެގޮތުން ބައެއް ފަރާތްތަކުން 15 ނުވަތަ 20 ބަސްތާ ހަނޑޫ ގޭގައި ފޮރުވާފައި ބަހައްޓާފައިވާކަމަށްވެސް އެރަށު މީހުން ދަނީ ބުނަމުންނެވެ.
ކޮވިޑް19 އާ ގުޅިގެން އަމިއްލަ ކުންފުނިތަކުގައި މަސައްކަތްކުރާ ގިނަ އަދަދެއްގެ މުވައްޒަފުންނަށް މުސާރަ ނުދިނުމާއި ވަޒީފާއިން ވަކިކުރުން ފަދަ ޙާލަތްތައް ދަނީ ކުރިމަތިވަމުންނެވެ. އެކަމުގެ ކަންބޮޑުވުން އެ މުވައްޒަފުން ދަނީ ކުރަމުންނެވެ.