މާމިގިލީގައި ކޮވިޑް-19 އާއި ގުޅިގެން ރައްކާތެރިވުމުގެ ގޮތުން ފިހާރަތަށް ހުޅުވުމަށް ވަކި ގަޑިއެއް ކަނޑައަޅާ ޑެލިވަރީ ފެށުމަށް އެރަށު ކައުންސިލުން ނިންމައިފިއެވެ.
މާމިގިލީ ކައުންސިލުން މިރޭ ނެރިފައިވާ އިޢުލާނެއްގައި ވަނީ، މާމިގިލީގައި ހިންގާ ބޭސް ފިހާރަތަށް ފިޔަވާ އެހެން ހުރިހާ ފިހާރަތަށް މާދަމާ އިން ފެށިގެން ކައުންސިލުން ވަކި ގޮތެއް އަންގަވަންދެން ހުޅުވައިފައި ހުންނަންވާނީ، ކޮންމެ ދުވަހަކު ހެނދުނު 6:00 އިން ހަވީރު 18:00 އާއި ދެމެދު ވަގުތު ތަކުގައި ކަމަށެވެ.
މީގެ އިތުރުން މި އިޢުލާނުގައިވަނީ، 18:00 އިން 23:00 އަށް ޑެލިވަރީ ކުރުމަށް ބޭނުންވާ ފަރާތްތަކުންނަށް އެ ފުރުސަތު ހުޅުވިފައިވާ ކަމަށެވެ.
މާމިގިލީގައި ޑެލިވަރީ ކުރައްވަން ބޭނުންވާ ފަރާތްތަކުން، ވިޔަފާރީގެ ނަމާއި، ގުޅޭނެ ފަތާތެއްގެ ނަމާއި ނަންބަރު މާދަމާ ހަވީރު 6:00 ގެ ކުރިން 7291676 ނަންބަރަށް މެސެޖެއް ކުރަށްވަން ވަނީ މާމިގިލި ކައުންސިލް އިދާރާއިން އެދިފައެވެ.
މާމިގިލީ ފިހާރަތަށް ވަކި ގަޑިއެއްގައި ހުޅުވާގޮތަށް ހަމަޖެއްސުމުގެ ބޭނުމަކީ، މީހުން އެއްވެ އުޅުން މަދުކުރުމަށާއި، ރޭގަނޑުގެ ވަގުތުތަކުގައި ގެއިން ބޭރަށް ނުނިކުމެ ގޭގައިތިބުމަށް ބާރު އެޅުމުގެ ގޮތުން ކަމަށެވެ.
މީގެއިތުރުން، ވިޔަފާރިކުރުމަށް ހުއްދަ ދީފައިވާ ވަގުތުގަ ފިހާރަތަކަށް ދާއިރުގަވެސް އިޖުތިމާއީ ގައިދުރުކަން ބެހެއްޓުމަށް މާމިގިލީ ކައުންސިލުން އެދިލައްވައެވެ.
