ކޮވިޑް-19 އާ ގުޅިގެން މެޑިކަލް ޕްރޮފެޝަނަލުންގެ ޓީމެއް ރާއްޖެ އަންނަން ހަމަޖެހިފައިވާކަމަށް މަބްރޫކް ވިދާޅުވެއްޖެއެވެ.
ކޮވިޑް19 އާ ގުޅޭގޮތުން މަޢުލޫމާތު ދިނުމަށް ނޭޝަނަލް އިމަރޖެންސީ އޮޕަރޭޝަން ސެންޓަރުން ދަރުބާރުގޭގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި އެން.އީ.އޯ.ސީގެ ތަރުޖަމާނު މުޙައްމަދު މަބްރޫކް އަޒީޒު ވިދާޅުވީ، މި މަހުގެ 20 ވަނަ ދުވަހުގައި ބަނގްލަދޭޝްއިން މެޑިކަލް ޕްރޮފެޝަނަލުންގެ ޓީމެއް ރާއްޖެއައުމަށް ހަމަޖެހިފައިވާކަމަށާއި، އެ މީހުން އައުމަށް ހަމަޖެހިފައިވަނީ ބަނގްލަދޭޝްގެ މިލިޓަރީ އެއަރކްރާފްޓުގައި ކަމަށެވެ.
ރާއްޖޭގައި މިހާރު ފެތުރެމުންދާ މިންވަރަށް ކޮންޓްރޯލް ވުމެއްނެތި ކޮވިޑް19 ފެތުރިގެންދާނަމަ، ފަރުވާދެވޭނެ މިންވަރަށް ސިއްހީ ޚިދުމަތްތެރި ނެތްކަމަށް ބުނެ ސަރުކާރުން ދަނީ ކަންބޮޑުވުން ފާޅުކުރަމުންނެވެ. އެހެންކަމުން، އެ ޙާލަތަށް ދިޔަ ނުދިނުމަށްޓަކައި އިޖުތިމާޢި ގައިދުރުކަން ބެހެއްޓުމަށް ކަމާބެހޭ ފަރާތްތަކުން ދަނީ ގޮވާލަމުންނެވެ.