ފ.އަތޮޅު ފީއަލީ ކައިރީ ކަނޑުމަތީން ހާލުގައި ޖެހިފައި އޮތް ލޯންޗަކަށް ފ.ނިލަންދޫ ޕޮލިސް ސްޓޭޝަނުގެ ފަރާތުން އެހީތެރިވެ، ލޯންޗުގައި ތިބި މީހުން ސަލާމަތްކޮށްދީފިއެވެ.
މީގެ އިރުކޮޅެއްގެ ކުރިން ފުލުހުން ކުރި ޓްވީޓެއްގައި ބުނެފައިވަނީ، އެޕްރީލް 18 ވަނަ ދުވަހުގެ ރޭގަނޑު އދ.އަރިއަދޫ އިން ފުރައިގެން 3 މީހުންނާއެކު ދ.މީދޫއަށް ދަތުރުކުރި ލޯންޗެއް ފ.ފީއަލީއާ ކައިރިން ކަނޑުމަތިން ހާލުގައި ޖެހިފައިވާކަމުގެ މަޢުލޫމާތު ލިބުމާ ގުޅިގެން، ފ.ނިލަންދޫ ޕޮލިސް ސްޓޭޝަނުގެ ފަރާތުން އެ ލޯންޗުގައި ތިބި 3 މީހުން ސަލާމަތްކޮށްދީ، ހެޔޮ ހާލުގައި ފ.ނިލަންދޫއަސް ގެންގޮސްފައިވާ ކަމަށެވެ.
ފުލުހުން އާންމުކުރި ފޮޓޯތަކުން، ލޯނުޗް ވަރަށް ބޮޑަށް ދިޔަވެ، ފަހަތުކޮޅު އަޑިއަށް ގޮސްފައިވާކަން ފާހަގަކުރެވުނުވެ.
ރާއްޖޭގައި ކޮވިޑް-19 ފެނި، ކޮމިއުނިޓީ ސްޕްރޑެއް އޮތުމުން، ރާއްޖޭގެ އެއްރަށުން އަނެއް ރަށަށް ދަތުރުކުރުން އެޗް.ޕީ.އޭ އިން ވަނީ މަނާކޮށްފައިވާއިރު، މި ލޯންޗު ދަތުރުކުރީ ހުއްދަ ހޯދައިގެންކަން ނުވަތަ ނޫންކަން އެނގޭކަށް ނެތެވެ. އަދި ފުލުހުންވެސް އެކަމާގުޅޭ އިތުރު މަޢުލޫމާތު މިހާތަނަށް ހާމަކޮށްފައެއް ނުވެއެވެ.