އެޕްރީލް މަހުގެ 19 އަދި 20 ވަނަ ދުވަހުގައި، ބޭންކް އޮފް މޯލްޑިވްސްގެ ބައެއް ޚިދުމަތްތައް ލިބޭނެކަމަށް އެ ބޭނުންކުން ބުުނެފިއެވެ.
ބީ.އެމް.އެލް އިން ކޮށްފައިވާ އިޢުލާނެއްގައި ބުނެފައިވަނީ، އެޕްރީލް މަހުގެ 19 އަދި 20 ވަނަ ދުވަހުގައި އަސާސީ ބައެއް ޚިދުމަތްތައް ދިނުމަށް ނިންމާފައިވާކަމަށާއި، ހުރިހާ ޚިދުމަތެއްވެސް ލިބޭނީ އޮންލައިންކޮށް ކަމަށާއި، ޚިދުމަތް ލިބޭނީ ހެނދުނު 09:30 އިން 12:30 އަށް ކަމަށާއި، އެ ގަޑިތަކުން ފަހުން ލިބޭ ރިކުއެސްޓްތައް ޕްރޮސެސްވާނީ ދެން ބޭންކް ހުޅުވާ ދުވަހެއްގައި ކަމަށެވެ.
މި ދެ ދުވަހުގައި، ބީ.އެމް.އެލް އިން ދޭ ޚިދުމަތްތަކަކީ، ރާއްޖެއިން ބޭރަށް ފައިސާ ފޮނުވުމާއި، މުވައްޒަފުންގެ މުސާރަ ޖަމާކޮށްދިނުމާއި، އޭޓީއެމް މެދުވެރިކޮށް ޖަމާކުރާ ޗެކް ޕްރޮސެސް ކުރުމުގެ އިތުރުން ލޯކަލް ބޭންކް ޓްރާންސްފަރ އެވެ.
ބީ.އެމް.އެލް އިން އިތުރަށް ބުނެފައިވަނީ، އެ ބޭންކުގެ ބްރާންޗްތަކުން ނަގުދު ފައިސާގެ އެއްވެސް މުއާމަލާތެއް ނުކުރާނެކަމަށާއި، ލޮކްޑައުން މުއްދަތުގައި ހުއްދަލިބޭ ކަސްޓަމަރުންނަށް އޭޓީއެމް މެދުވެރިކޮށް ނަގުދު ފައިސާ ނެގުމާއި ޖަމާކުރުމުގެ ޚިދުމަތް ލިބޭނެކަމަށާއި، އެގޮތުން ވިޔަފާރި އެކައުންޓްތަކަށް 200,000 ރުފިޔާ ޖަމާކުރެވޭނެކަމަށާއި، އަމިއްލަ ފަރުދުންގެ އެކައުންޓަކަށް ދުވާލަކަށް 50,000 ރުފިޔާ ޖަމާކުރެވޭނެކަމަށެވެ.
މާލޭ ސަރަހައްދު ފުރަބަންދުކޮށްފައިވާ މުއްދަތުގައި، ގޭގައި ތިބެގެން ބޭންކިންގ ޚިދުމަތް ހޯދުމަށް ބާރުއެޅުމުގެ ގޮތުން ބޭންކުގެ ހުރިހާ ބްރާންޗްތަކާއި ސަރވިސް ސެންޓަރުތަކެއް ބަންދުވާނެކަމަށްވެސް ބީ.އެމް.އެލް އިން ބުނެފައިވެއެވެ.