ކޮވިޑް-19 އާ ގުޅިގެން މިއަދު އެކަނިވެސް 43 ޢިމާރާތެއް މޮނިޓަރިންގ ޙާލަތަށް ގެނެސްފައިވާކަމަށް މަބްރޫކް ވިދާޅުވެއްޖެއެވެ.
ކޮވިޑް-19 އާ ގުޅޭގޮތުން މަޢުލޫމާތު ދިނުމަށް ނޭޝަނަލް އިމަރޖެންސީ އޮޕަރޭޝަން ސެންޓަރުން ދަރުބާރުގޭގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި އެން.އޯ.އީ.ސީގެ ތަރުޖަމާނު މުޙައްމަދު މަބްރޫކް އަޒީޒު ވިދާޅުވީ، ރާއްޖޭގައި ކޮވިޑް-19 ފެތުރިގެންދާ މި ދަނޑިވަޅުގައި ރައްކާތެރިކަމުގެ ފިޔަވަޅެއްގެ ގޮތުން މިއަދު އެކަނިވެސް 43 ޢިމާރާތެއް މޮނިޓަރިން ގެ ޙާލަތަށް ގެނެސްފައިވާކަމަށާއި، މިވަގުތު 193 ތަނެއް މޮނިޓަރިންގެ ޙާލަތުގައި ހުންނާނެކަމަށެވެ.
މަބްރޫކް އިތުރަށް ވިދާޅުވީ، މޮނިޓަރިންގެ ޙާލަތުގައި ހުރި ތަންތަނުގެ ތެރޭގައި ގެއާއި ޢިމާރާތާއި އެޕާޓްމަންޓް ވެސް ހިމެނޭކަމަށެވެ. މިވަގުތު ރާއްޖޭގެ ޙާލަތަށް ބަލާއިރު، 84 މީހަކު ރާއްޖެއިން ކޮވިޑަށް ފައްސިވެފައިވާއިރު، 39 ދިވެހީން ހިމެނެއެވެ. މިއަދު އެކަނިވެސް ރާއްޖެއިން 17 މީހަކު ވަނީ ކޮވިޑަށް ފައްސިވެފައެވެ.