ހޫނު ގަދަ ޤައުމުތަކުގައި ކޯވިޑް-19 ފެތުރޭ މިންވަރު ލަސްވާނެކަމަށް ދިރާސާއަކުން ދައްކައިފިއެވެ.
އެމެރިކާގެ އެމްއީޓީ ގެ ސައިންޓިސްޓުންތަކެއް ހެދި މި ދިރާސާއިން ދައްކާގޮތުން ކޯވިޑް-19 ބޮޑަށް ފެތުރިފައިވަނީ ފިނި ހޫނުމިން 3 ޑިގްރީ ސެލްސިއަސް އާއި 17 ޑިގްރީ ސެލްސިއަސް އާއި ދެމެދުގައި ހުރި ޤައިމުތަކުގައެެވެ. މިއަށްވުރެ ހޫނު ވިޔަސް ކޯވިޑް-19 ފެތުރޭނެ ކަމަށް އެ ދިރާސާއިން ދައްކައެވެ. ނަމަވެސް ފެތުރޭ މިންވަރު ފިނި ސަރަހައްދުތަކާއި ބަލާއިރު ލަސްކަމަށް ދިރާސާއިން އެނގެއެވެ.
ދުނިޔޭގެ ދެކުނު ތަނޑީގެ ޤައުމުތަކުގައ މިހާރު ހޫނު މޫސުން އޮތް އިރު، އެ ޤައުމުތަކުގެ އެވަރެޖް ފިނިހޫނުމިން އުޅެނީ 18 ޑިގްރީ ސެލްސިއަސްގައެވެ. އަދި މި ޤައުމުތަކުގައި ކޮވިޑު-19 ޖެހިފައިވާ އަދަދުތަކަށް ބަލާއިރު އެއީ މިހާތަނަށް ޖެހުނު މީހުންގެ 6 އިންސައްތައެވެ.
ދިރާސާ ހެދުމުގައި އިސްކޮށް އުޅުއްވި ޑރ.ޤާސިމް ބުހާރީ ފާހަގަކުރެއްވި ގޮތުގައި، ފިނި ސަރަހައްދުތަކުގައި ކޮވިޑު-19 ފެތުރުނު މިންވަރު އަވަހެވެ. މިސާލެއްގެ ގޮތުން ޑރ.ޤާސިމް ނެންގެވީ ޔޫރަޕުގެ ޤައުމުތަކެވެ. އަދި އެ ޤައުމުތަކުގައި ސިއްހީ ނިޒާމު އެހާ ކުރިއަރާފައިވާއިރުވެސް ކޮވިޑު-19 އެހާބޮޑަށް ފެތުރެމުންދަނީ އެހެންވެ ކަމަށް އޭނާ ވިދާޅުވިއެވެ.
އެމެރިކާއަށް ބަލާއިރު، ހޫނު ގަދަ ސްޓޭޓުތައް ކަމުގައިވާ އެރިޒޯނާ، ފްލޮރިޑާ އަދި ޓެކްސަސްގައި ކޮވިޑު-19 ފެތުރޭ މިންވަރުލަހެވެ. ނަމަވެސް ނިއުޔޯކް، ވޮޝިންޓަން އަދި ކޮލްރާޑޯގައި ކޮވިޑު-19 ދަނީ ބާރަށް ފެތުރެމުންނެވެ.
ހޫނު ގަދަ ތަންތަން ބާރަށް ނުފެތުރުނު ނަމަވެސް ވައިރަސް ފެތުރޭނެކަމަށް ޑރ.ބުހާރީ ވިދާޅުވިއެވެ. އަދި އެކަމަށް ސަމާލުކަންދީ އަޅަންޖެހޭ ފިޔަވަޅުތައް އެޅުމަށް އިލްތިމާސް ކުރެއްވިއެވެ.
ބައެއް އެހެން ޤައުމުތަކުގައި ހަދާފައިވާ ދިރާސާތަކުންވެސް ދައްކާގޮތުން ފިނި ހޫނުމިނުން ކޯވިޑް-19 ފެތުރޭ މިންވަރަށް އަސަރު ކުރެއެވެ. މިގޮތުން ޗައިނާގައި ކޯވިޑް-19 ފެތުރުނުއިރު ހޫނު ގަދަ ސިޓީތަކުގައި ވައިރަސް ފެތުރުނު މިންވަރު ލަސްކަމަށް ދިރާސާތަކުން ދައްކައެވެ.
އެހެން ނަމަވެސް ކޮވިޑް-19 ޖައްސާ ވައިރަސް އަކީ އާންމު ހޫނު ގަދަ މާހަލަށް ބަލި ވައިރަސްތަކާއި ބަލާއިރު ހޫނަށް އެހާ ބަލި ވައިރަސްއެއް ނޫނެވެ. އެހެން ކަމުން ހޫނު ގަދަ ޤައުމުތަކުގައިވެސް ލަހުން ނަމަވެސް ވައިރަސް ފެތުރުމުގެ ފުރުސަތު ވަރަށް ބޮޑެވެ. އަދި މި ވައިރަސް އަކީ މުޅިން އާ ވައިރަހެއް ކަމުން ވައިރަސް ގެ ގިނަ ކަންތައްތައް ސައިންސްވެރިންނަށް ވަނީ ނުހޯދިފައެވެ.
އެހެން ކަމުން މިފަދަ ދިރާސާއަކުން ހޫނު ގަދަ ޤައުމުތަކުގައި ފެތުރޭ މިންވަރު ލަސްކަމަށް ފެނުނުނަމަވެސް، ހޫނު ގަދަ ހިސާބުތަކުގައިވެސް ރައްކާތެރިކަމުގެ ގޮތުން އަޅަންޖެހޭ އެންމެހާ ފިޔަވަޅުތައް އަޅަން ސައިންސްވެރިން ވަނީ އިލްތިމާސްކޮށްފައެވެ.