ކޮވިޑް-19 ޖެހިގެން މަރުވި މީހާއަކީ ކޭސް 126 އާއި ގުޅުން ހުރި މީހެކެވެ.
މިހާރު ކުރިއަށްދާ ޚާއްސަ އޮލައިން ނޫސްވެރިންގެ ބައްދަލުވުމުގައި ހެލްތް މިނިސްޓަރ އަބްދުﷲ އަމީން ވިދާޅުވީ، މަރުވި މީހާއަކީ 83 އަހަރުގެ އައިމިނަތް އާދަމް ނަމަކަށް ކިޔައި އުމުރުން ދުވަސްވީ އަންހެނެއް ކަމަށާއި އަދި މި މީހާއަކީ ކޭސް 126 އާއި ކޮންޓެކްޓް ވެފައިވާ މީހެއް ކަމަށެވެ.
އޭނާގެ ސާމްޕަލް 28 ވަނަ ދުވަހުގެ ފަތިހު ވަނީ ނަގައިފައި ކަމަށާއި ސާމްޕަލްގެ ނަތީޖާ ލިބުނު އިރު އޭނާ ވަނީ މަރުވެފަކަމަށް އަމީން ވިދާޅުވިއެވެ.
މީގެ އިތުރުން ހެލްތް މިނިސްޓަރ އަމީން ވިދާޅުވީ، މިރޭ ކޮވިޑް-19 ޖެހިގެން މަރުވި މީހާގެ ހިނެވުމުގެ ކަންތައްތައް ކުރިއަށް ގެންދަވަނީ ސިފައިންގެ އަންހެން ބޭކަނބަލުން ކަމަށާއި އަދި މި ކަނބަލުންނާއި ސިފައިން މިކަމަށް ވަނީ ތަމްރީންވެ، ތައްޔާރުވެފައިވާ ކަމަށެވެ.
އަމީން ވަނީ ސަރުކާރުގެ ފަރާތުން މި ހިތާމައިގައި ބައިވެރިވެ އާއިލާއަށް ތައުޒިޔާ ދަންނަވާފައެވެ.