ރާއްޖެއިން ކޮރޯނާވައިރަސް، ކޮވިޑް-19 އަށް ޕޮޒިޓިވްވެގެން ފަރުވާދެމުން ދިޔަ އިތުރު ދެމީހަކު ބަލިން ރަނގަޅުވެއްޖެ ކަމަށް ސަރުކާރުން ހާމަކޮށްފި އެވެ.
މިހާތަނަށް މީގެ ކުރިން ވައިރަސް ޖެހުނު ތިން މީހަކު ބަލިން ވަނީ ރަނގަޅުވެފަ އެވެ. މިއަދު ރަނގަޅުވި މީހާއާއެކު ޖުމްލަ މިހާތަނަށް ފަސް މީހަކު ވަނީ ވައިރަސް ޖެހިގެން ރަނގަޅުވެފަ އެވެ.
މިއަދު މެންދުރުފަހު، ދަރުބާރުގޭގައި ބޭއްވި ނޫސްވެރިންގެ ބައްދަލުވުމިުގައި ވާހަކަ ދައްކަވަމުން އައިޖީއެމްއެޗް ޑރ. މުހައްމަދު އިސްމާއިލް ވިދާޅުވީ، ޕޮޒިޓިވްފައި ތިބި މީހުންގެ ތެރެއިން އިތުރު ދެމީހަކު ވައިރަހަށް ނެގަޓިވްވުމުން މިހާރު އެމީހުން ގެއަށް ދޫކޮށްލާފައިވާ ކަމަށެވެ.
ރާއްޖެއިން ވައިރަހަށް ޕޮޒިޓިވްވި 13 މީހުންގެ ތެރެއިން ޖުމްލަ ފަސް މީހުން ބަލިން ރަނގަޅުވުމުން މިހާރު ފަރުވާދެނުން އަންނަނީ އަށް މީހަކަށް ކަމަށް ޑރ. މުހައްމަދު އިސްމާއިލް ފާހަގަ ކުރެއްވި އެވެ.
”[ވައިރަހުން މީހުން ރަނގަޅުވުމުގެ] މާނައަކީ އަޅުގަނޑުމެންނަށް އޮތް ރިސްކު ކުޑަވެގެން ދިޔުމެއް ނޫނޭ. އަޅުގަނޑުމެން ގޭގައި އެކަހެރިވެގެން ތިބުން ނުވަތަ ސޯޝަލް ޑީސްޓެންސިން ހުއްޓާލުމެއް ނޫނޭ،“ ޑރ. މުހައްމަދު އިސްމާއިލް ވިދާޅުވި އެވެ.
ޑރ. ވިދާޅުވީ، އަދިވެސް ރާއްޖެއަށް މީހުން އަންނަމުންދާ ކަމަށާއި ބަލި މީހުންނަށް ފަރުވާދެމުންދާއިރު، ބައެއް މީހުން ކޮންޓެކްޓީންކޮށްފައިވެސް ވާކަމަށެވެ. އެހެން ކަމުން އަދިވެސް ރާއްޖެއަށް ނުރައްކާ އެބައޮތް ކަމަށް ޑރ. ވިދާޅުވި އެވެ.
”ހާއްސަކޮށް މި ދުވަސްވަރު ވަކިން ނުވަތަ ސޯޝަލް އައިސޮލޭޝަންގައި ތިބުމުގެ ބޭނުމަކީ، ކޮންމެ ބަލިމީހެއްގެ ފަރާތުން ގާތްގަނޑަކަށް ދޭއް ނުވަތަ ތިން މީހުންނަށް ވައިރަސް ފެތުރިފައި ހުރެދޭނެ. އެހެންވެއްޖެ ނަމަ އެމީހުންގެ ފަރާތުން އަނެއްކާވެސް އެހެން މީހުންނަށް ފެތުރިދާނެ،“ ބަލީގެ ނުރައްކާތެރިކަން ހާމަކުރުމުން ޑރ. ވިދާޅުވި އެވެ.
އެހެން ކަމުން މިދުވަސްކޮޅު ގޭގައި މަޑުުކުރުމަކީ ބަލި ފެތުރުން ކޮންޓްރޯލްކުރުމަށް އެޅޭނެ އެންމެ ބޮޑު ފިޔަވަޅު ކަމަށް ޑރ. ވިދާޅުވި އެވެ.
މިހާތަނަށް ރާއްޖެއިން 673 ސާމްޕަލް ވައިރަހަށް ޓެސްޓު ކުރިއިރު 660 މީހުން ވަނީ ވައިރަހަށް ނެގެޓިވްވެފަ އެވެ. ކަރަންޓިންގައި ތިބި ޖުމްލަ މީހުންގެ އަދަދަކީ، 496 މީހުންނެވެ.