- ކޮވިޑް-19 ގެ ސަބަބުން ރާއްޖޭގެ އިގްތިސާދަށް ކުރާ އަސަރު ކުޑަ ކުރުމަށް ވިޔަފާރިވެރިންނަށް އެކަނި ފައިސާ ދީގެން އާންމުން ދިރިއުޅޭ ގެތަކަށް ފައިސާ ނުވަންނަ ކަމަށާއި މިއީ ގެތަކުގައި ދިރިއުޅޭ ރައްޔިތުންނަށް ވެސް އެހީވާންވި ވަގުތު ކަމަށް ދިވެހި ރައްޔިތުންގެ ޕާޓީގެ ލީޑަރު އަބްދުﷲ ޖާބިރު މިއަދު ވިދާޅުވެއްޖެއެވެ.
”ކުއްލި ޚަބަރަށް“ ދެއްވި އިންޓަވިއުއެއްގައި ޖާބިރު ވިދާޅުވީ ބޮޑެތި ކުންފުނިތަކަށް އެކަނި ލިބޭ ފައިސާގެ ސަބަބުން ހުރިހާ ގޭބިސީތަކަށް އެކަމުގެ ފައިދާ ނުކުރާނެ ކަމަށެވެ. އަދި މިވަގުތު ރާއްޖެ އަށް ބޭނުން ވަނީ ރަނގަޅު ކޮންޓިންޖެންސީ ޕްލޭނެއް ކަމަށް ވެސް ޖާބިރު ވިދާޅުވިއެވެ.
ކޮވިޑް-19 އާ ގުޅިގެން އެތައް ބައެއްގެ ވަޒީފާތައް ގެއްލި، ގިނަ ބައެއްގެ މުސާރަ ކުޑަކުރަމުންދާ ކަން ފާހަގަ ކުރައްވައި ޖާބިރު ވިދާޅުވީ، މިވަގުތު ސަރުކާރުން އިސްނަގައިގެންް ގޭބީސީތަކަށް އެހީ ފޯރުކޮށްދިނުން ވަރަށް މުހިއްމު ކަމަށެވެ.
”ގޭބިސީތަކަށް ފައިސާއެއް ނުވަންނާނެ، ނޫންތޯ ހުރިހާ އެންމެންނަކީ އެންމެ ބޮޑެތި ވިޔަފާރިވެރިން ކައިރީ މަސައްކަތް ކުރާ ބައެއް ނޫން. އެހެންވީމަ ސަރުކާރުން އެބަ ޖެހޭ މިކަހަލަ ގޭބީސީތަކަށް ކޮންމެވެސް ވަރެއްގެ އެހީއެއް ދެއްވަން. އެއީ މިހާލަތުން އަރައިގަތުމަށް. ވަގުތު އޮއްވާ ރަނގަޅު ކޮންޓިންޖެންސީ ޕްލޭނެއް މިހާލަތުން އަރައިގަންނަން އެބަ ބޭނުންވޭ،“ ޖާބިރު ވިދާޅުވިއެވެ.
ޖާބިރު ވިދާޅުވީ ވިޔަފާރިތަކަށް އެހީވުމަށް ފައިސާ ދެނީ ބޭންކްތަައް މެދުވެރިކޮށް ކަމަށްވާ އިރު، އެ ފައިސާ ވެސް އަވަހަށް ފޯރުކޮށްދިނުން މުހިއްމު ކަމަށެވެ.
ޖާބިރު އެގޮތަށް ވިދާޅުވި އިރު، ޓޫރިޒަމް ދާއިރާ އަށް ލިބެމުންދާ ގެއްލުންތަކުން އަރައިގަތުމަށްޓަކައި، ބޭންކް އޮފް މޯލްޑިވްސް (ބީއެމްއެލް) އިން ލޯނަށް އެދި ހުށަހަޅާ ކޮންމެ ރިސޯޓަކަށް ނުވަތަ ގެސްޓް ހައުސްއަކަށް ވެސް އެންމެ ގިނަވެގެން 30 މިލިއަން ރުފިޔާ ނުވަތަ ދެ މިލިއަން ޑޮލަރު ލިބޭނެ ސްކީމެއް ވަނީ ތައާރަފްކޮށްފައެވެ.
”އިންޑަސްޓްރީތަކަށް އެހީވާން ދޭ ފައިސާ ބޭންކުން އެބަ ޖެހޭ އަވަހަށް ފޯރުކޮށްދޭން. ދެން އާންމުކޮށް ބޭންކްތައް އޮޕަރޭޓްވަނީ ކޮމާޝަލްކޮށް. ނަމަވެސް މިކަމުގައި ޖެހޭ މި ޕްރޮސެސް އަވަސް ކުރަން. ސަރުކާރުން ފައިސާ ދޭން ނިންމީ ވަރަށް ރަނގަޅު މަގްސަދެއްގައި. އެކަން ހާސިލް ވާނީ މި މަސައްކަތް އަވަސްވެގެން. މި ފައިސާ އެބަ ޖެހޭ އިންޑަސްޓްރީތަކަށް ޖެނެރޭޓްވާން.“ ކާށިދޫ ދާއިރާގެ މެމްބަރު ކަން ވެސް ކުރައްވާ ޖާބިރު ވިދާޅުވިއެވެ.
ދުނިޔޭގައި ހަލުވިކަމާ އެކު ފެތުރެމުންދާ ކޮވިޑް-19 ގެ އަސަރު ރާއްޖެ އަށް ކުރަމުންދާތީ ވިޔަފާރިތަކަށް އަންނާނެ ހީނަރު ކަމަށް ވިސްނައި އެހެން ވިޔަ ނުދިނުމަށް އިންޓްރެސްޓް ރޭޓް ދަށްކޮށް އަނބުރާ ދެއްކޭ ގޮތަށް ލުއި ލޯންތަކެއް ހަމަޖައްސައި ދިނުމަށް ރާވަމުން އަންނަ ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވަނީ ވިދާޅުވެފައެވެ.
މިނިސްޓަރު ވިދާޅުވީ، އިންޓްރެސްޓް ރޭޓު ދަށްކޮށް ވީހާވެސް ލުއި ގޮތްތަކެެއް އަނބުރާ ލޯނު ދެއްކުމަށް އެކުލަވައިލުމަކީ ވިޔަފާރިތައް މުޅިން ބަނގުރޫޓު ނުވެ ބެހެއްޓުމަށް އަޅަން ޖެހޭ މުހިންމު ފިޔަވަޅެއް ކަމަށް ދެކެވަޑައިގަންނަވާ ކަމަށެވެ.
އަދި މީހުންގެ ވަޒީފާތައް ގެއްލުނަ ނުދިނުމަށް ވެސް އެއީ އެޅިދާނެ މުހިންމު ފިޔަވަޅެއް ކަމަށް މިނިސްޓަރު ވިދާޅުވިއެެވެ.