ދިވެހިރާއްޖެއިން ކޮވިޑް-19 އަށް ފައްސިވެފައިވާ މީހުންގެ ތެރެއިން އިތުރު 2 މީހަކު ރަނގަޅުވެއްޖެއެވެ. މިކަން އާންމުކޮށްފައިވަނީ މިއަދުގައި ބޭއްވި ޕްރެސް ބްރީފިންގ ގައެވެ.
މިއަދު ރަނގަޅުވި 2 މީހުންނާއެކު، ރާއްޖެއިން މިހާތަނަށް 11 މީހަކު ކޮވިޑް-19 ޖެހިގެން ވަނީ ރަނގަޅުވެފައެވެ. އެހެންކަމުން މިވަގުތު ކޮވިޑް-19 އަށް ފަރުވާ ދެމުންގެންދާ މީހުންގެ އަދަދަކީ 3 އެވެ.
ރާއްޖެއިން މިހާތަނަށް 16 މީހަކު ކޮވިޑް19 އަށް ފައްސިވެފައިވާއިރު، އޭގެތެރޭގައި، އައިލެންޑް ސަފާރީގައި ކަރަންޓީނު މުއްދަތު ފުރިހަމަކުރުމަށްފަހު ސާޕަލް ރިޕޯޓް ނުލިބެނީސް އިއްޔެ އިޓަލީއަށް ފުރުވާލިފަހުން ފައްސިވި 2 މީހުން ހިމެނެއެވެ.
ކޮވިޑް19 އަށް ޓެސްޓްކުރުމަށްޓަކައި މިހާތަނަށް 880 ސާމްޕަލްއެއް ނަގާފައިވާއިރު އޭގެތެރެއިން 843 ސާމްޕަލްއެއް ނައްސިވިއިރު، ފައްސިވެފައިވަނީ 16 ސާމްޕަލް އެވެ. އައިސޮލޭޝަންގައި މިހާރު ތިބި މީހުންނަށް ބަލާއިރު، ވެލިދޫ އައިލެންޑް ރިސޯޓުގައި 20 މީހަކު ތިބިއިރު، ދަރުމަވަންތަ ހޮސްޕިޓަލުގައި 3 މީހަކު އެބަތިއްބެވެ. ކަރަންޓީނު ފެސިލިޓީތަކުގައި 824 މީހުން ތިބިކަން ވެސް ފާހަގަކުރެވެއެވެ.