ހިޖުރައިން 18 ވަނަ އަހަރު ޝާމް ކަރައިގެ ޢަމްވާސް ގައި ފެތުރުނު ގައިންގަޔަށް އަރާ ޠާޢޫން ބަލީގައި، ޝާމްކަރައިގެ 25 ހާސް މުސްލިމުން މަރުވިކަމަށް ވެއެވެ. އޭގެ ތެރޭގައި ވަރަށް ގިނަ ޞަޙާބީން ވެސް ހިމެނެ އެވެ. އެވަގުތު އެ ސަރަޙައްދުގައި މުސްލިމުންގެ އިސްބޭފުޅަކަށް ހުންނެވީ މާތް ޞަޙާބީ ޢަމްރު ބިން ޢަލްޢާއްޞް އެވެ. ގައިންގައިން އަރާ ބަލި އޮތީ މުޅި ޢަމްވާސަށް ފެތުރިފައެވެ. އެންމެ ފަހުން ޢަމްރު ރައްޔިތުންނަށް އަމުރު ކުރެއްވީ ބަލި މީހުންނާ ގާތް ނުވުމަށާއި އެއްވުންތައް ނުބޭޭއްވުމަށާއި އެކި ތަންތާ ވަކި ވަކި ވެގެން ތިބުމަށެވެ. އަދި ހެޔޮ ޞިއްޙަތުގައި ތިބި މީހުންނާއިގެން ޢަމްރު ވަޑައިގެންނެވީ ބަލި މީހުންނާ ދުރަށް ފަރުބަދަތަކުގެ މައްޗަށެވެ. ބަލި ފިލައްޖައުމަށްދާންދެން މުޅި ޢަމްވާސް އޮތީ ކަރަންޓީނު ކޮށްފައެވެ. މިގޮތައް ޢަމަލުކުރަންފެށިތާ ދުވަސްތަކެއް ނުވަނީސް ވަބާ އެއްކޮށް ފިލައި ހިގައްޖެއެވެ. އެ ދުވަސްވަރަކީ ޢުމަރުގެފާނުގެ ޚިލާފަތުގެ ދުވަސްވަރެވެ. ޢަމްރު ކަންތައް ކުރެއްވި ގޮތުގެ ވާހަކަ ޚަލީފާއަށް ލިބިވަޑައިގަތުމުން އުފާކުރެެއްވިއެވެ. އަދި ދެކޮޅެެއް ނުހެއްދެވިއެވެ.
ހަމަ މިފަދައިން އިސްލާމީ ވަރުގަދަ ޙަޟާރަތެއް އޮތް އަނދަލުސްގައިވެސް ގައިން ގައިން އަރާ ޠާޢޫން ބަލި ފެތުރިގެން ދިއުމުން ޚަލީފާ ޢަބްދުއްރަޙުމާން އައްނާޞިރު މީސްތަކުންނަށް އަމުރު ކުރެއްވީ ރައްޔިތުން ގެއަށް ވަދެ ބޭރަށް ނުނިކުމެ ގޭގައި ތިބުމަށެވެ. އަދި ތަންތަނުގައި ޖަމާވެ ނުތިބުމަށެވެ. މިގޮަތައް ޢަމަލު ކުރަން ފެށިތާ ގިނަ ދުވަސްތަކެއް ނުވެ ވަބާ ފިލައި ހިގައްޖެ އެވެ.