ރާއްޖޭގައި ކަރަންޓީނަށް ފޮނުވޭ މީހުންނާ ޑައިރެކްޓް ކޮންޓެކްޓްވާ މީހުން މިހާރު ވަރަށް މަދުވާނެކަމަށް މަބްރޫކް ވިދާޅުވެއްޖެއެވެ. މަބްރޫކް މިގޮތަށް ވިދާޅުވީ، ދަރުބާރުގޭގައި މިއަދު ކުރިއަށްގެންދިޔަ ޕްރެސް ކޮންފަރެންސްގައެވެ.
މަބްރޫކް ވިދާޅުވީ، ކަރަންޓީނަށް ގެންދެވޭ މީހުން ފުރަތަމަ އިށީންނާނީ ވަކި ގޮނޑިއެއްގައި ކަމަށާއި، އެމީހުންގެ ލަގެޖްވެސް ރޫމަށް ގެންދާނީ ވަކިން ކަމަށެވެ. އަދި، ކަރަންޓީނަށް ގެންދިއުމަށްޓަކައި ފުރަތަމަ އެޓެންޑްކުރާ މީހުންވެސް ތިބޭނީ ރައްކާތެރިކަމުގެ ފިޔަވަޅުތައް އަޅައިގެންކަމަށާއި، އެހެންކަމުން ކުރިއަށް އޮތްތާނގައި، ކަރަންޓީނަށް ގެންދެވޭ މީހުންނާ ކޮންޓެކްޓްވާ މީހުން ވަރަށް މަދުވާނެ ކަމަށް މަބްރޫކް ވިދާޅުވިއެވެ.
މަބްރޫކް މިހެން ވިދާޅުވެފައި މިވަނީ، ރާއްޖޭގައި ކަރަންޓީނަށް ގެންދެވޭ މީހުންނާ ގިނަ ފަރާތްތަކާ ކޮންޓެކްޓްވާ ކަމާއި، ކޮންޓެކްޓްވާއިރު އިޖުތިމާޢީ ގައިދުރުކަން ނެތްކަމުގެ ޝަކުވާތައް ގިނަވެފައިވާ ދަނޑިވަޅެއްގައެވެ. އަދި، އެޗް.އައި.އެޗް އިން ކަރަންޓީނު އެހެން ފެސިލިޓީއަކަށް މީހުން ބަދަލުކުރުމުގައި އިޖުތިމާޢީ ގައިދުރުކަން ނެތްކަމަށް ބުނާ މައްސަލައެއް އެޗް.ޕީ.އޭ އިން ބަލަމުންގެންދާކަމަށްވެސް އެޗް.ޕީ.އޭއިން ވަނީ ބުނެފައެވެ.