ރާއްޖޭގައި ހިންގަމުންދާ ހުރިހަ ސިނަމާތަކާއި ފިލްމު ތިއޭޓަރުތައް ވަގުތީގޮތުން ހިންގުން ހުއްޓާލުމަށް އަންގައިފިއެވެ. މިގޮތަށް އަންގާފައިވަނީ ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު މިއަދު ނެރުނު އަމުރެއްގައެވެ.
ކޮވިޑް19 ފެތުރުން ކޮންޓްރޯލްކޮށް، އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި ޑިރެކްޓަރ ޖެނެރަލް އޮފް ޕަބްލިކް ހެލްތު ނެރުނު މި އަމުރުގައިވާ ގޮތުން، މިހިނހާ މާރިޗު މަހުގެ 30 އިން ފެށިގެން ވަކިގޮތެއް އަންގެންދެން ސިނަމާތަކާއި ފިލްމު ތިއޭޓަރުތައް ހިންގުން ހުއްޓާލަން ޖެހެއެވެ.
ރާއްޖޭގައި އާންމު ސިއްހަތުގެ ކުއްލި ނުރައްކަލުގެ ޙާލަތުގެ ދަށުން ޑިރެކްޓަރ ޖެނެރަލް އޮފް ޕަބްލިކް ހެލްތު ނެރުއްވާ ޢަމުރުތަކާ ޚިލާފުވާ ފަރާތްތަކާމެދު ފިޔަވަޅު އަޅަމުންދާނެކަން ކަމާބެހޭ ފަރާތްތަކުން ގެންދަނީ ވިދާޅުވަމުންނެވެ.