ކޮވިޑް19 އާ ގުޅިގެން، މޮނިޓަރިންގ ގެ ޙާލަތަށް ގެނެސްފައިވާ ހުރިހާ ރިސޯޓެއް މޮނިޓަރިންހ ޙާލަތު ނިމުމަކަށް ގެނެސް، އާންމު ޙާލަތަށް ބަދަލުކުރެވިފައިވާކަމަށް ސަރުކާރުން އިޢުލާންކޮށްފިއެވެ.
ސަރުކާރުގެ ފަރާތުން ދަރުބާރުގޭގައި މިހާރު ކުރިއަށްދާ ޕްރެސް ކޮންފަރެންސްގައި ކޮވިޑް19 ގެ ތަރުޖަމާނު މުހައްމަދު މަބްރޫކް އަޒީޒު ވިދާޅުވީ، ރިސޯޓުތައް އާންމު ޙާލަތަށް ގެނެވިފައިވީނަމަވެސް، ކޮވިޑް19 އަށް ޝައްކުކުރިގެން ސާމްޕަލް ނެގުމަށްޓަކައި ބޯޓުތަކެއް މޮނިޓަރިންގެ ޙާލަތަށް ބަދަލުކުރެވިފައިވާނެކަމަށް ވިދާޅުވިއެވެ.
ރާއްޖޭގެ މިވަގުތުގެ ޙާލަތަށް ބަލާއިރު، މިހާތަނަށް 1089 ސާމްޕަލް ނެގިފައިވާއިރު ފައްސިވެފައިވަނީ 17 ސާމްޕަލްއެވެ. ނައްސިވެފައިވަނީ 933 ސާމްޕަލްއެކެވެ. ފައްސިވެފައިވާ 17 މީހުންގެ ތެރެއިން މިހާތަނަށް 13 މީހަކު ވަނީ ރަނގަޅުވެފައެވެ. ކޮވިޑް19 ޖެހިގެން މިވަގުތު ފަރުވާދެމުންދަނީ 2 ދިވެހިންނެވެ. ފައްސިވި 17 މީހުންގެ ތެރެއިން ރާއްޖެއިން އިޓަލީއަށް ފުރުވާލި ދެމީހުން ހިމެނެއެވެ.