އެކަން ހާމަކޮށް ރައީސުލްޖުމްހޫރިއްޔާގެ އޮފީހުން ނެރުނު ބަޔާނެއްގައި ވިދާޅުވެފައި ވަނީ، ކޮވިޑް-19 އާ ގުޅިގެން ސަރުކާރި ސްކޫލްތައް ބަންދުކޮށް ގެއިން ނުކުމެ ނޫޅުމަށް އަންގާފައިވާތީ މުއާޞަލާތީ ޚިދުމަތްތައްކާއި އިންޓަރނެޓުގެ ޚިދުމަތްތައް މެދުކެނޑުމެއްނެތި، އެންމެ ފުރިހަމަ ގޮތުގައި ރައްޔިތުންނަށް ފޯރުކޮށްދިނުމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހު އަންގަަވާފައިވާ ކަމަށެވެ.
އަދި އެކަމާއި ގުޅިގެން އެ ކުންފުނިތަކާއި ބައްދަލުކޮށް މި ދަނޑިވަޅުގައި ރައްޔިތުންގެ މާލީ ހާލަތަށް ބަދަލުތަކެއް އަންނާނެކަން ދެނެގަނެ، ގޭގައި މަޑުކުރުމާއި ގޭގައި ތިބެގެން ދަރިވަރުންނަށް އުނގަންނައިދިނުމުގައި އިންޓަރނެޓު ބޭނުންކުރާ މިންވަރު އިތުރުވާތީ، ސަރުކާރުންވަނީ މިކަމުގައި އެހީތެރިކަން ފޯރުކޮށްދިނުމަށް އަންގާފައިކަމަށް ރައީސް އޮފީހުން ވިދާޅުވިއެވެ.
އެގޮތުން ސަރުކާރުން ހުށަހެޅި ހުށަހެޅުންތަކަށް ބަލާއިރު،
🤩 ކޯވިޑް ޓާސްކްފޯސްގެ މަސައްކަތްތަކަށް ނެޝަނަލް އެމަރޖެންސީ އޮޕަރޭޝަންސް ސެންޓަރ (އެން.އީ.އޯ.ސީ) އާއި އެ އިދާރާގެ ސެލްތަކަށް ބޭނުންވާ އިންޓަރނެޓުގެ ޚިދުމަތްތައް އެއްވެސް އަގަކާއި ނުލައި ފޯރުކޮށްދިނުން.
😍 ޑިރެކްޓަރ ޖެނެރަލް އޮފް ޕަބްލިކް ހެލްތްގެ އެންގެވުމުގެ ދަށުން އެކަހެރިކޮށްފައިވާ (ކަރަންޓީން އަދި އައިސޮލޭޓް ކޮށްފައިވާ) މީހުންނަށް އެއްވެސް އަގަކާއި ނުލައި އިންޓަރނެޓުގެ ޚިދުމަތްތައް ފޯރުކޮށްދިނުން.
☺️ މި ދަނޑިވަޅުގައި އިންޓަރނެޓު ބޭނުންކުރާ މިންވަރު އިތުރުވާނެކަމަށް ބަލައި، ”ޑޭޓާ ކެޕް“ ނުވަތަ އިންޓަރނެޓު ޕެކޭޖްތަކުގައި ކަނޑައަޅާފައިވާ ”ޑޭޓާ އެލަވަންސް“ އިތުރުކޮށްދިނުމާއި، އެ ޕެކޭޖެއްގައި ކަނޑައަޅާފައިވާ ޑޭޓާގެ މިންވަރު ހަމަވުމުން އިތުރު ޑޭޓާއަށް އެދުމަށް ދޫކުރާ ”ޑޭޓާ ބޫސްޓަރ“ ޕެކޭޖުތަކުގެ އަގު ހެޔޮކޮށްދިނުން.
😍 އަދި ކޮންމެ ޕެކޭޖެއްގެ ދަށުން ފޯރުކޮށްދޭ ”ޑޭޓާ އެލަވަންސް“ ފިކްސްޑް ބްރޯޑްބޭންޑް ކަސްޓަމަރުންގެ ތެރެއިން %70 ކަސްޓަމަރުންނަށް އަދި މޯބައިލް ބްރޯޑްބޭންޑް ކަސްޓަމަރުންގެ ތެރެއިން %50 ކަސްޓަމަރުންނަށް ދެގުނައަށް އިތުރުކޮށްދިނުމަށް ސަރުކާރުން ވަނީ ހުށަހަޅާފައެވެ.
ނުވަތަ
😍 މޯބައިލް ބްރޯޑްބޭންޑް ކަސްޓަމަރުންނަށް، އެ ކަސްޓަމަރުންގެ ”ޑޭޓާ އެލަވަންސް“ ހަމަވުމުން އިންޓަރނެޓުގެ ޚިދުމަތް ބޭނުންކުރެވޭނެ ގޮތަށް ކޮންމެ ދުވަހަކު އައު ކުރެވޭ ”ޑެއިލީ އަންކެޕްޑް އެލަވަންސް“ އެއް ތައާރުފުކުރުމަށް ސަރުކާރުން ހުށަހަޅާފައި ވެއެވެ.
ރައީސް އޮފީހުން ވިދާޅުވީ، ސަރުކާރުން އުންމީދުކުރަނީ އެގޮތަށް ޚިދުމަތްތައް ފޯރުކޮށްދޭ ކުންފުނިތަކުން އަމަލު ކުރާނެ ކަމަށް ކަމަށެވެ.
މީގެ އިތުރުން، ”ޑޭޓާ އެލަވަންސް“ ހަމަވުމުންވެސް އިންޓަރނެޓުގެ ޚިދުމަތް ހަލުވި ސްޕީޑެއްގައި ކަސްޓަމަރުންނަށް ފޯރުކޮށްދިނުމަށް އިތުރު ފަހި ގޮތްތަކެއް އިންތިޒާމު ކުރުމަށް ސަރުކާރުން ވަނީ ކުންފުނިތަކަށް އަންގާފައެވެ.