މާލެގައި ބޮޑު އަގުގައި ކުލި ދައްކައިގެން އުޅޭ މީހުން ކުލި ނުދެއްކޭކަމުގައިވަނީ ނަމަ ރަށަށް އަބުރާ ދިޔުމަށް ގޮވަލާ ކެނދިކުޅުދޫ ދާއިރާގެ މެންބަރު އަހުމަދު އީސަ ދެއްކެވި ވާހަކަ ދިފާއު ކުރައްވައި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވާހަކަފުޅު ދައްކަވައިފި އެވެ.
މަޖިލީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރައިސް ނަޝީދު ވިދާޅުވީ ރައްޔިތުންނަށް ޤަބޫލު ކުރަން ދަތި ތެދު ހަޤީޤަތް ސިޔާސީ ލީޑަރުން ހާމަ ކުރައްވަން ޖެހޭ ކަމަށާއި އެފަދަ ހަޤީޤަތްތައް ހާމަ ކުރުމުން ބައެއް އާންމުންގެ ނުރުހުން ވެސް އަމާޒުވާ ކަމަށެވެ. ނަމަވެސް އެފަދަ ހަޤީޤަތް ހާމަ ކުރުމަކީ މުހިންމު ކަމަށް އެމަނިކުފާނު ވިދާޅުވި އެވެ.
މީގެ އިތުރުން އެމަނިކުފާނު ވިދާޅުވީ، ދިމާވެގެން އުޅޭ ހާލަތަކީ ދަތި އުނދަގޫ ހާލަތެއް ކަމަށެވެ. އެ ކަމުން އަރައިގަތުމަށް ޓަކައި ހާލުގައި ދިރިއުޅެމުންދާ ފަރާތްތައް ހޯދައި އެ ފަރާތްތަކަށް ގޮތެއް ހޯދައި ދިނުމަށް ރީޕެޓްރިއޭޝަން ޕްރޮގްރާމެއް ހިންގަން ޖެހޭނެ ކަމަށް ވެސް ވިދާޅުވި އެވެ.
ރައިސް ނަޝީދު އިތުރަށް ތަފްސީލް ކޮށް ވިދާޅުވީ، ވަޒީފާ ގެއްލުނީމަ ކުލި ދެއްކޭނެ ގޮތެއް ނެތް މީހުނަނަށް އެއްޗެއް ދޭން ޖެހޭނެކަމަށެވެ. އަދި ދެވޭ އެއްޗެއް އެއީ އޭނާ އެއްޗެއް އުފައްދަން ދޭ އެއްޗެއްގެ ގޮތުގައި ވާން ޖެހޭނެ ކަމަށްވެސް ރައީސް ނަޝީދު ވިދާޅުވިއެވެ.