ރާއްޖޭގެ ދަނޑުވެރިން ހައްދާ ތަކެތި ގަތުމަށްޓަކައި އެގްރި ސެންޓަރެއް ޤާއިމްކުރުމަށް ނިންމާފައިވާކަމަށް އެސް.ޓީ.އޯ އިން ބުނެފިއެވެ.
ްއެސް.ޓީ.އޯ އިން މިއަދު ބޭއްވި ނޫސްވެރިންގެ ބައްދަލުވުމުގައި އެސް.ޓީ.އޯގެ މެނޭޖިންގ ޑިރެކްޓަރ ޙުސައިން ޢަމްރު ވިދާޅުވީ، ކޮވިޑް19 އާ ގުޅިގެން އިޤްތިޞާދަށް ހީނަރުކަން އައިސްފައިވާ މިދަނޑިވަޅުގައި، ދަނޑުވެރިކަން ކުރާ ފަރާތްތަކަށް ފުރުޞަތުތަކެއް ފަހިކޮށްދޭނެކަމަށާއި، ރަނގަޅު އާމްދަނީއެއް ލިބޭނެ މަގުފަހިކޮށްދޭނެކަމަށެވެ.
ޢަމްރު ވިދާޅުވީ، ދަނޑުވެރިން ހައްދާ ތަކެތި ގަތުމަށް މާލޭ ނޯތު ހާބަރުގައި އެކަމަށް ޚާއްޞަ އެގްރި ސެންޓަރެއް ހަދާނެކަމަށާއި، އެސެންޓަރަށް ތަކެތި ވިއްކުމަށްޓަކައި ރަޖިސްޓްރީވާންޖެހޭނެ ކަމަށާއި، ރަޖިސްޓްރީވުމަށް ހުށަހަޅަންޖެހޭ ފޯމު އެސް.ޓީ.އޯގެ ވެބްސައިޓުންނާއި ރަށްތަކުގައި ހުރި އެސް.ޓީ.އޯ ފާމަސީން ލިބޭނެކަމަށެވެ. އަދި، މި ސެންޓަރަށް ދަނޑުވެރިން ވިއްކާ ތަކެއްޗަށް ވަގުތުން ފައިސާ ލިބޭނެ އިންތިޒާމް ހަމަޖައްސާނެކަމަށް އެސް.ޓީ.އޯ އިން ބުނެފައިވެއެވެ.
ރާއްޖޭގެ އިޤްތިޞާދު ހަމައެކަނި ފަތުރުވެރިކަމަށް ބަރޯސާވެފައި އޮންނަން ނުޖެހޭކަމަށް ފާހަގަކޮށް ޢަމްރު އިތުރަށް ވިދާޅުވީ، އެސް.ޓީ.އޯ އިން ދަނޑުވެރިކަން ކުރިއެރުވުމަށް މި ފެށި މަސައްކަތުގެ ދަށުން ދަނޑުވެރިންނަށް އެކަށީގެންވާ އާމްދަނީއެއް ލިބޭނެކަމަށެވެ. އަދި މިހާތަނަށް ދަނޑުވެރިކަން ކުރިއަރާފައި ނުވަނީ ދަނޑުވެރިންނަށް އެކަށީގެންވާ އާމްދަނީއެއް ލިބިފައިނުވާތީކަމަށްވެސް ވިދާޅުވިއެވެ.