އިނގިރޭސިވިލާތުގައި ކޮވިޑް-19 ޖެހިގެން ވެންޓިލޭޓަރުގައި ފަރުވާދެމުން އަންނަ ބައެއް މީހުން ވެންޓިލޭޓަރުން ނައްޓާލަން ޖެހިދާނެކަމަށް ބްރިޓިޝް މެޑިކަލް އެސޯސިއޭޝަނުން ބުނެފިއެވެ.
މި ގޮތައް ބްރިޓިޝް މެޑިކަލް އެސޯސިއޭޝަން އިން ނިންމާފައި މިވަނީ ކޮވިޑް-19 އާއި ގުޅިގެން ވެންޓިލޭޓަރުތަކުގައި ފަރުވާ ދޭންޖެހޭ މީހުންގެ އަދަދު އިތުރުވެ، ސިއްހީގޮތުން އެންމެ ކުރިއަރާފައިވާ ގައުމުތަކުންވެސް އިތުރު ވެންޓިލޭޓަރުތަކަށް ބޭނުން ވެފައިވާ ދަނޑިވަޅެއްގައެވެ.
ބްރިޓިޝް މެޑިކަލް އެސޯސިއޭޝަނުން އެންމެ ފަހުން އާންމުކުރި ކޮވިޑް- 19 އާއި ގުޅޭ ގަވާއިދުގައި ބުނާގޮތުން ކޮވިޑް-19އަށް ވެންޓިލޭޓަރުގައި ފަރުވާ ދެމުން އަންނަ، ބަލިމީހާ ރަނގަޅުވަމުންއަޔަސް އޭނާއަށް ވުރެ ރަނގަޅު މީހަކު އަތުވެއްޖެނަމަ އެ ވެންޓިލޭޓަރުން ނައްޓާލަން ޖެހެއެވެ. ގަވާއިދުގައި އިތުރަށް ބުނެފައިވަނީ ކުރިއަށް އޮތްތަނުގައި ބަލި ޖެހޭ މީހުންގެ އަދަދު އިތުރުވެ، ފަރުވާ ދިނުމަށް ބޭނުން ކުރާ ވެންޓިލޭޓަރުތަށް މަދުވާނެ ކަމަށް ބަލައި ދެން ފަރުވާ ދިނުމުގައި ބަލާނީ އަންނަ ބަލި މީހުންގެ ތެރެއިން އެންމެ ހާލު ރަނގަޅު މީހާއަށް ކަމަށެވެ. އެހެންކަމުން އިނގިރޭސިވިލާތުގެ ޑޮކްޓަރުންނަށާއި ސިއްހީ ދާއިރާގައި ކުރީ ސަފުގައި ތިބި ފަރާތްތަކަށް ވަނީ އުނދަގޫ ނިންމުންތައް ނިންމަން ޖެހިފައެވެ.
އިނގިރޭސިވިލާތުން ކޮވިޑް-19 ޖެހިގެން މިހާތަނަށް އެގައުމުން މިހާރު 33،718 ކޭސް ޕޮޒިޓިވް ވެފައިވާއިރު، 3000 އެއްހާ މީހުންވަނީ މަރުވެފައެވެ.
