ނެޝެނަލް އެމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލު ވުމުގައި ވާހަކަ ދައްކަމުން އެސެންޓަރުގެ ތަރުޖަމާނު މުހައްމަދް މަބުރޫކް އަޒީޒް އޮންލައިން ކޮށް ލިބެން ހުރި ހިދުމަތުގެ ބޭނުން ގޭގައި ތިބެގެން ހިފުމަށް އިލްތިމާސް ކޮށްފިއެވެ.
މަބުރޫކު މިހެން ވިދާޅުވެފައި މިވަނީ ގިނަބަޔަކު ތޮއްޖެހިގެން ތިބެ މިއަދު ބޭންކުން ހިދުމަތް ހޯދާފައިވާތީއެވެ. މިއަދު ގިނަ މީހުން ތޮއްޖެހިގެންތިބެ ބޭންކުތަކުން ހޯދާފައިވާ ހިދުމަތްތަކަކީ އޮންލައިންކޮށްވެސް ލިބެން ހުރި ހިދުމަތްތަކެއް ކަންވެސް މަބުރޫކު ފާހަގަ ކުރެއްވިއެވެ. ބޭންކުތަކުން ހިދުމަތް ހޯދާ މީހުން ވަކި ދުރުމިނެއްގައި ތިބެގެން ހޯދުމަށްވެސް މަބުރޫކު އިލްތިމާސްކުރެއްވިއެވެ.
މިއަންނަ ހަފްތާގައި ވެސް އާދިއްތަ، އަންގާރަ އަދި ބުރާސްފަތި ދުވަހު ހެނދުނު 9:00 އިން ފެށިގެން މެންދުރު 12:30 އަށް ބޭންކުގެ ހިދުމަތް ލިބޭނެ ކަމަށް އެމްއެމްއޭ އިން ބުނެފައިވެއެވެ.