އެސްޓީއޯ ސްޕަމަރޓުން އިންޓަނެޓް މެދުވެރިކޮށް އެސްޓީއޯ އީސްޓޯރު ވެބްސައިޓުން ގޭގައި ތިބެގެން ވިޔަފާރި ކުރެވޭނެ އިންތިޒާމެއް އެސްޓީއޯ އިން ހަމަޖައްސާފިއެވެ.
އެސްޓީއޯއިން ބުނީ، އެސްޓީއޯ ސްޕަމަރޓުން އިންޓަނެޓް މެދުވެރިކޮށް ގަންނަން ލިބެން ހުނަތަކެތީގެ ތެރޭގައި އާމު ދިރިއުޅިމަށް ބޭނުންވާ ކާބޯތަކެއްޗާއި، ކޮސްމެޓިކްސްއާއި، ކުޑަކުދިންނަށް ބޭނުންވާ ނެޕީއާއި އެހެނިހެން ތަކެތި ހިމެނޭނެކަމަށެވެ.
އަދި މީގެ އިތުރުން އެސްޓީއޯއިން ބުނީ، އިންޓަނެޓް މެދުވެރިކޮށް އެސްޓީއޯގެ ސްޕަމަރޓުން ގަންނަ ތަކެތި ޑެލިވަރީ ކޮށްދޭ ކަމަށާއި ނޫނީ 30 މިނެޓު ފަހުން އަމިއްލައަށް ވެސް ބަލައި އާދެވޭނެ ކަމަށެވެ. އަދި އިންޓަނެޓް މެދުވެރިކޮށް ގަނެފައިވާ ތަކެއްޗަށް ވެބްސައިޓުން ފައިސާ ދެއްކޭނެ ކަމަށްވެސް އެސްޓީއޯއިން ބުންޏެވެ.
ރާއްޖޭގައި ސިއްހީ ކުއްލި ހާލަތު ނެރިފައި ވުމާއެކު ރައްކާތެރިވުމުގެ ގޮތުން މާލޭގެ ގިނަ ފިހާރަތަށް މިވަނީ ބަންދު ކޮއްފައެވެ. ނަމަވެސް މިފިހާރަތަކުން ވެސް ދަނީ ޑެލިވެރީ ކޮއްދެމުންނެވެ.
