ކޮވިޑް19 އާ ގުޅިގެން އެމެރިކާގެ ކެލިފޯނިއާ އިން ވަޒީފާ ގެއްލޭ މީހުންގެ އަދަދު ރެކޯޑް މިންވަރަކަށް އިތުރު ވެއްޖެއެވެ.
ކޮވިޑްްް19 ގެ ސަބަބުން ދުނިޔޭގެ އިޤްތިޞާދު އިނދަޖެހެމުންދާ މި ދަނޑިވަޅުގައި ގިނަ އަދަދެއްގެ މީހުންގެ ވަޒީފާ ގެއްލެމުންދާކަން ޤައުމުތަކުން ދަނީ ހާމަކުރަމުންނެވެ. އެގޮތުން އެންމެ ފާހަގަކޮށްލެވެނީ، ކެލިފޯނިއާގައި ވަޒީފާ ގެއްލޭ މީހުންގެ އަދަދު ރެކޯޑް މިންވަރަކަށް އިތުރުވެ، 2 މިލިއަނެއްހާ މީހުންގެ ވަޒީފާ ގެއްލިގެން ދިއުމެވެ.
39.9 މިލިއަން މީހުން ދިރިއުޅޭ ކެލިފޯނިއާގައި، ނިމިގެންދިޔަ ހަފްތާގައިވެސް 879000 މީހުންގެ ވަޒީފާ ވަނީ ގެއްލިފައެވެ. މުޅި އެމެރިކާއިން ވަޒީފާ ގެއްލީފައިވާ މީހުންގެ އަދަދަށް ބަލާއިރު 3.3 މިލިއަނަށް ވުރެ ގިނަ މީހުންގެ ވަޒީފާ ގެއްލިއްޖެއެވެ.
ކެލިފޯނިއާއިން ވަނީ މި ޙާލަތުގައި ވިޔަފާރިތައް ބަނގުރޫޓްވިޔަ ނުދިނުމަށްޓަކައި ކުދި އަދި މެދު ފަންތީގެ ވިޔަފާރިތަކަށް ޚާއްޞަކޮށްގެން ލޯނި ސްކީމެއް ތަޢާރަފް ކޮށްފައެވެ.
