300 އެނދުގެ އައިސޮލޭޝަން ފެސިލިޓީއެއް ހަދަމުންދާކަމަށް ސަރުކާރުން އިޢުލާންކޮށްފިއެވެ.
ކޮވިޑް19 އާ ގުޅޭގޮތުން މަޢުލޫމާތު ދިނުމަށް ދަރުބާރުގޭގައި މިހާރު ކުރިއަށްދާ ޕްރެސް ކޮންފަރެންސްގައި ކޮވިޑް19 ގެ ތަރުޖަމާނު މުޙައްމަދު މަބްރޫކް އަޒީޒު ވިދާޅުވީ، އަލަށް ހަދަމުންދާ އައިސޮލޭޝަން ފެސިލިޓީ ހަދަމުންދަނީ ކޮވިޑް ވިލެޖްގައި ކަމަށެވެ. ކޮވިޑް ވިލެޖް ހުންނަނީ ހުޅުމާލޭގައެވެ.
އަލަށް ހަދާ ފެސިލިޓީގެ މަސައްކަތް ކުރަމުންގެންދަނީ އެމް.އެންޑީ.އެފުން ކަމަށާއި، މި މަސައްކަތުގައި ސަރުކާރުގެ މިނިސްޓްރީތަކާއި ސަރުކާރު ބައެއް ކުންފުނިތަކުގެ އެހީތެރިކަންވެސް ލިބެމުންދާކަމަށް މަބްރޫކް ވިދާޅުވިއެވެ. އަދި، މި ފެސިލިޓީ 15 އެޕްރީލްއަށް ނިންމުމަށް މަސައްކަތް ކުރަމުންދާއިރު، މިތަނުގެ މަސައްކަތުގައި 24 ގަޑިއިރު ޙަރަކާތްތެރިވަމުންދާ ކަމަށާާއި، މި ފެސިލިޓީގައި، ޚާއްޞައެހީއަށް ނުވަތަ އަވަސް ފަރުވާ ދެވޭނެ އިންތިޒާމް ހަމަޖެހިގެންދާނެކަމަށާއި، ގިނަ އަދަދެއްގެ ވެންޓިލޭޓަރުވެސް ބެހެއްޓޭނެކަމަށް ވިދާޅުވިއެވެ.
މީގެއިތުރުން، ފަރުކޮޅު ފުށީގައި މަރާމާތުކުރި އައިސޮލޭޝަން ފެސިލިޓީގައި، 50 އެނދާއި އައިސީޔޫ 2 އެނދު ހުންނާނެކަމަށާއި، ރާއްޖޭގައި މިހާރު އެކި ކަންކޮޅުތަކުގައި 97 ވެންޓިލޭޓަރު ހުންނާނެކަމަށާއި، ކުރިއަށް އޮތް ހަފްތާގެ ތެރޭގައި އިތުރު 67 ވެންޓިލޭޓަރު ރާއްޖެ ގެނެވޭނެކަމަށްވެސް ވިދާޅުވިއެވެ.